MOOSHOOFPAADZENGERS TOP 40

maandag 21 juli 2014

Wie al ieëre vermeldj hebbe wae bie oos BBQ fieëst mèt alle lede vanne MHPZ, de ega's, kinjer en aanhang allemaol kinne stumme op oos favoriete leedjes. De lede vanne groep hebbe op 10 leedjes gestumtj en de angere allemaol op 5. Bie eine ekseekwoo tèldje de stumme van de zengers zelf döbbel. Dao mocht op laajf nummers waere gestumtj van de Boontje Aovendje en nateurlik op alles waat op muziekdragers steit. Det zeen LP's, cassettebendjes en ceedees.Op die muziekdragers staon 94 versjillendje leedjes. Dao is in totaal op 75 versjillendje leedjes gestumtj. Dus mer 19 leedjes hebbe hieëlemaol gein stum gekrege.
Hiê-oet is gebleke det ederein toch ein groeët aantal leedjes gaer huuèrtj. Wae hebbe oeteindelik de top 22 gedreitj. Vanaaf de 23e plaats haje de leedjes eigelik mer hieël weinig stumme.
Ongerstaondj de komplieëte lieêst van die 22 leedjes;

22     barbekjoew - neet Miss - in veur en vlam - straotname - baer den achteropsjöt - blief neet stilstaon
20     wan 't laeve effe lachtj + zet de tied stil
19     den aoje Limburger winne
18     noesjieerig
17     mien autooke
16     't Brook
15     laat heivers
13     de mooshoof huuertj bie paad + jeugdherinneringe
11     miene beste vreendj + hieeremins minsgenaoje
10     tungeldersewel
09     hollendsj lieere les 1
08     Blome
07     Limburg mien Limburg
06     optocht
05     't Durp
04     Dora
03     Onbespote
02     Dich Allein
01     WULLEM

de nummers 7,8,9 en 10 kwome tot standj door de keuzes van de zengers zelf, die de doorslaag hebbe gegaeve. Dees drie leedjes haje alle veer aeve vul peuntje en de stumme van de zengers zelf teldje dus dubbel. Zoeë auch de leedjes op nummer 4 en 5.
Bie de euverige leedjes wore de extra stumme neet van toepassing.

De volgendje waek vermeldje wae nog de diverse bezunjerhede van de Top 40. en van welke CD/LP de
meiste leedjes kwome. En welke CD/LP dus eigelik veur de  Mooshoof femilie de beste is.

weurtj vervolgtj

BBQ FIEEST MHPZ FEMILIE

dinsdag 15 juli 2014

Op 21 juni j.l. hebbe wae mèt de groep, oos ega's, kinjer, vrinj en vriendinne en ega's vanne kinjer en dao auch al weer kinjer van, ....eine BBQ gehaoje i.v.m. oos 40 jaorig bestaon. Wae haje det al ettelikke kieëre ieëre gedaon jaore trök, mer noê kòst 't neet oetblieve. 't Woort eine vreiselik sjoeëne daag. Ein aantal van oos kinjer hebbe de zaak georganiseerdj, mèt hie en dao advies van òs nateurlik. Zjaak van Keune Leike waas weer zoeë gastvriê gewaest òm zien graas matje besjikbaar te stèlle. 't Leek waal of wae op eine green stònge van ein golfbaan. Hae haaj d'r extra völ werk aan besteetj. Later bleek woeëròm.
Roondj ein eurke of 16.00 wore de meiste dao en kòste wae al drek geniete van ein lekker drenkske. Dao waas flink ingeslage, dus 't kòst get lieje. Allein vònje wae mèt ein paar man det de BBQ toch waal erg laat aan ging. De maag woort al get ònröstig. Begòst get te ròmmele en zelf krege wae auch hònger. Mer dao oppins gingder toch get gebeure. Dao kwaam de fomfaar St. Willibrordus oet Rooj achteròm. Keeh, det waas nog ins aardig det die ein serenade kwome bringe vanwege oos jubileum. Teminste det dachte d'r ein aantal. Mer dao wore d'r auch ein behuuërlik aantal die waal baeter wiste. Waat waas 't gevâl ??
De börgemeister Jos Heijmans begost tot de Mooshoof te spraeke. Vôl inne zon en gestange op eine aoj krat van Maos Beer (woeë 't allemaol mèt begost is veur de mooshoofpaad), rigdje hae zich oeteindelik tot Jan Coenen ( Jan van Dèkkers Harie ). 't Waas eine hieële rieëmsel, mer veur Jan neet drek dudelik woeërom. Nao ein opsomming van diverse aktiviteite, mèt as hoofdmoot de Mooshoofpaadzengers, kwaam hae oeteindelik mèt de weurd ; daorom heet 't ziene majesteit de keuning behaagtj......etc. Toen veel 't kwartje bie Jan pas echt. Hae kreeg oetgereiktj Lid in de Orde van Oranje Nassau !!
Mede door zien toedoon hebbe de Mooshoofpaadzengers door die 40 jaore haer ein hieël groeëte bie drage gelevertj aan 't behaot van 't limburgs dialect en ein hieël groeëte kulturele biedrage veur Rooj, de Gemeindje Wieërt en Limburg. Daonaeve auch al ruum 4 x 11 jaor hieël groeëte biedrages gelevertj aan de Rojer vastelaovendj in 't Zaomaale landj. Nog diverse anger aktiviteite veur voetbalclub Brevendia en
de Ouderen Vereniging.
Dao volgdje ein serenade vanne Fomfaar en hieël völ felisitaties van völ aanwezige. Dao kost nateurlik auch neet oetblieve det de euverige 7 Mooshoofpaadzengers auch ein serenade gove. Die kwaamder en ederein kost geniete van ein geweldjig sjoeën echt Mooshoofpaad leedje door Lei van Kraomers Sjelke gesjreve.De òmgaeving waas ideaal. 't Waer waas grandioos en alle minse die dao bie-ein wore wore super. 't Fieëst woort almer sjoeëner. DJ Michel gaaf zich hieëlemaol. Hieël völ lekkere muziek oet de sevventies tot noê.
Auch waaster door alle aanwezigen gestumtj op de leedjes vanne MHPZ welke men de sjoeënste leedjes vònj van de Mooshoofpaadzengers. Eine heuze top 40 woort oeteindelik gedreitj. Roondj middernacht waas de nummer 1 bekindj. Daonao waas 't weer wiejer flink fieëste tot in de klein eurkes.
Eder  ging tevreje en meug heivers en kòst trök kieke op ein geweldjig fieëst mèt eine echte groeëte femilie bandj. Eine bandj vanne MOOSHOOFPAAD  Femilie.  Geweldjig.
De oetslaag van de Mooshoofpaadzengers top 40 keumtjer aan. Auch weer bie 't noets. 
Zeedjer al benoetj waatj geit waere ??????

CEEDEES MOOSHOOFPAADZENGERS

donderdag 10 juli 2014

TER  INFORMATIE

Veur waat oos CD's betreftj, kònne wae kort zeen. Allein de CD "APPLEMOOS" is nog te kriege bie
Jan van Dèkkers Harie. Kan eventueel versteurtj waere. Koste ; € 10,-  excl. verzendkoste.
eventueel via mail te bestèlle ;  jagerocoenen@home.nl

Helaas hebbe wae van de euverige CD gein exemplare mieër in oos bezit. Die zeen "gelökkig" in de periode det ze oet kwome, allemaol aan de man gegange. Dao wore wae steeds weer erg door verrastj.
Haotj aevegood oos "noets" op saajt inne gate. Weem weit geit d'r nog get gebeure in oos jubileumjaor ???

40 JAOR MOOSHOOFPAADZENGERS

donderdag 10 juli 2014

Dit jaor bestaon de MHPZ 40 jaor. De datum det det echt is, is op 10-10-2014. Fieërtig jaor geleje haje wae
toen de ieërste bie-einkòmst veur oze ieërste optraeje op de Boontje Aovendj in Rooj bie de Zaotmaale.
Lei van Kraomers Sjelke, Jan van Dèkkers Harie, Zjaak van Keube Leike, Geer van Betje, Geer van To  en
Jan van Klauewrs Tjeuke. Oos ieërste optraeje waas 't begrave van de lèste krat Maos Beer. De Brouwerie
ging anger beer brouwe en Maos zien Beer was niet meer.
Weem haaj toen kinne vermoede det wae 40 jaor later nog steeds bie-ein zeen mèt dezelfdje groep.
Jan van Klauwers Tjeuke woort nao paar jaor vervange door Thei van Matje, mer binne 2 jaor wore Jan van To en Frans van Matje al bie de groep gekome. Get jaore later kwam dao nog de Funs (Heuvelmans) bie de
groep. Helaas is òs Geer van To inmiddels ontvalle. Wae drage hum nog altiêd bie os, middels ein prachtige bros , die Geer òs nog zelf heet opgepseltj, zoeëdet hae altiêd bie òs kòst zeen. Foto van die speltj biegaondj.
Wae hebbe inmiddels toch zoeë aaf en toe nog ins ein optraeje gedaon. Neet te völ, mer zoeë aaf en toe as wae dao zelf veural völ plezeer en good geveul bie kriege. Dao kome wae nog ins op trök. 

21 juni 2014 hebbe wae bie gelegenheid van oos Jubileum jaor ein groeët fieëst gehaoje mèt oos vrouwkes
( Z-tjes) en oos zoons en dochters (meuskes en spruutjes). Die kinjer hebbe inmiddels vrinj, vriendinne en auch al ega's (sjarlotte en poor). Sommige hebbe al "ertjes en buuënkes"!!!! Dus al kleinkinjer.
"t waas eine geweldjigge daag, woeëvan nog mieër verslaag keumtj en foto's. Wae haje eine favoriete top 40 van de MHPZ. Alle aanwezige haje gestumtj op heur favoriete Mooshoof leedjes. De oetslaag hievan keumtjer auch aan.
Auch anger foto's gaon d'r weer biekome.
Dao is op de diverse thoês fronte van alles gebeurtj 't lèste jaor. Gaondje wèg kinne wae dein en danger waal oppe saajt deile.

weurtj vervolgtj

TIP TIP TIP VEUR DE KERSTMIS

vrijdag 6 december 2013

Wae hebbe mesjien paar tips veur de Kerstdaag. Hebdjer de PC aangeslote op Bokse inne hoeskamer, dan kondjer met die daag de Kerst CD  "op dinj vant jaor" aaf speule. Dan hebdjer sjieke Kerstmuziek inne kamer. Dao weurtj aan gewirktj dedjer dan auch inne gang de tekste weer met kontj zinge.

Angere tip, as dedjer nog ein sjoeen muzikaal kedooke wiltj aansjaffe, de leste ceedee van de mooshoofpaadzengers ;  APPLEMOOS.
Gae kontj die nog koupe oppe Veldstraot 29 in Rooj. Koste  10 EUR.

dit wore zoeemer get klein Kerst-tipkes.

hehe, eindelik, dao is weer get.............

vrijdag 29 november 2013

bèste minse, leef fens.......... 't heet erg lang gedoortj. Excuzes hiê veur. 't Heet zoeë zien reje gatj. Gooj reje. Wae gaon ze neet oetlègge, mer dao wore echt dinger die d'r steeds tösse kwome. Gezoondjheid,drök drök drök. Vekansies, exames, tentames etc. etc. Wae haje 't auch gaer anges gezeen, mer dao ging steeds weer get anges neet wie 't haaj mòtte gaon. Ein stuuëring veroorzaakdje det alle tekste wègvele. Alles is noê weer opgepaktj en dao is begost mèt de tekste van "applemoos". Eder waek weurtj weer get aangevöltj, zoeëdetj gae steeds weer get anges d'r bie zeetj kome. Auch gaon wae de tekste vanne Kerstceedee hieëlemaol aanvölle, zoeë detj gae mèt de Kerstdaag de leedjes ane ope haart mèt kòntj zinge. Noew fotoos waere aangevöltj, mèt korte annekdootes, verhaole. Veural euver det waat wae gedaon hebbe, maar toch auch dingskes die wae gaon doon. dus kiektj weer regelmaotig oppe saajt òm alles te weet tekome. ......de MHPZ.....

DE LIMBO TOP 100 VAN 2013

zondag 17 maart 2013

STUM  OP  DE  MHPZ  VEUR  DE  LIMBO  TOP 100  2013

Wie kòndjer stumme op de leedjes van de Mooshoofpaadezengers ??
Als volgtj;
• Gaotj nao de site van L1
• Völ bie ZOEK in ;  limbo top 100 2013
• Gae kriegtj info euver de L1 top 100 en euver Thei en Marij
• In dit stök steit de link; Er kan - net als vorig jaar - weer via HIER internet gestemd worden
Klik deze link aan
• Noe kriegdjer de oetlèk wiedjer kòntj/mòtj stumme
• Klik op ;  gros lijst
Op deze liêst staon alle leedjes woeë detj gae op moogtj stumme
• Gae moogtj helaas mer 2 leedjes van de Mooshoofpaadzengers invölle. Van die, die in dae liêst staon.
• Oos verzeuk is òm op  LIMBURG  MIEN  LIMBURG te stumme
• As 2e leedje  DORA. Dit ter naogedachtenis aan oze GEER, dae det leedje heet gesjreve.
• Bie de 8 anger leedjes diedjer dan nog in mòtj völle, anges is eur liêsje neet geldjig, oze Tip òm op oos vrinj THEI  en MARIJ te stumme, heur leedje VELDBOEKET. De euverige 7 modjer dan effe inne liêst kieke.
• Wiltj gae gaer op anger leedjes van de Mooshoofpaadzengers stumme, dan modjer die leedjes aangaeve in de “ Wenslijst “.
Op dees leedjes kòndjer dan volgendj jaor stumme, die staon dan in de “groslijst”.

Gaotj ane slaag en oze hertelikke dank as detj gae op de Mooshoofpaadzengers wiltj stumme. DANKE DANKE DANKE






NOE  STUMME  OP  DE  MOOSHOOFPAADZENGERS  .......LIMBURG MIEN LIMBURG

dit kan via L1  site --  zoek ...Limbo top 100 2013...... in artiekel Thei en Marij op de blauwe link klikke......good laeze en alles geit vanzelf.......twiee leedjes invölle maag.......oos vraog òm op LIMBURG  MIEN  LIMBURG  te stumme........daonaeve op DORA ter naogedachtenis veur oze GEER dae dit heet gesjreve.......

weurtj vervolgtj




Bèste muziek vrinj, leef fens en anger volk,

op 9 Mei 2013, Hemelvaartsdaag , ister weer de jaorlikse Limbo Top 100 op radio en Tillevisie van L1.
Veurig jaor haje wae ein sjoeën 76e plaats mèt "LIMBURG MIEN LIMBURG" in de liêst en det terwiel de CD "Applemoos" pas ein paar maondj oet waas.
Daoròm wille wae uch vreentjelik verzeuke dit jaor weer zoeë vòl meugelik op oos leedje te gaon stumme. Op de site steit binnekort eine liêst mèt alle leedjes woeëdetj gae op moogtj stumme. Zoeë gouw as dae liêst d'r is, laote wae det op oos site wete. Veurig jaor mocht men op drie leedjes stumme. De juuste regels veur det stumme zeen auch oppe site van L1 aangegaeve.
wae gaon uch oppe huuëgdje haoje.
As 't zoeë wiêt is , laot 't auch aan femilie, vrinj, naober en collega's wete. Wie mieër stumme wie baeter/lever en auch wie hoeëger de posisie kan waere inne liêst. 't Is auch altiêd ein lekker geveul asse in zoeëne liêst terecht keumst. Mer zoeë as zoeë dèk tegewoordig, bèsse aafhankelik van 't aantal stumme desse geist kriege.
Wie gezagt gaon wae uch oppe huuëgdje haoje euver dein en danger.
Bedanktj alvast veur straks as dedjer gaotj stumme.

                                                                                        de Mooshoofpaadzengers

VERKOUP OLS CD 2013 VANAAF VANDAAG 23-2-13

zaterdag 23 februari 2013

Wie al gesjreve is vanaaf vandaag de Ceedee veur 't OLS 2013 in Rooj , georganiseerdj door de Hei-jer sjötterie Sint Antonius, tekoup in Rooj bie de C1000, dameskleding Christian oppe Marijkestraot en bie de bookhanjel Benelux oppe julianastraot. Veur ein prieske van € 7,50 kriegdjer, echt kriegdjer ein Ceedee mèt mer leefst 10 leedjes.  Vief vanne Mooshoofpaad en viêf van de Hoebe Drê Band. Daobie nateurlik de
spesjaal gesjreve en opgenome leedjes veur 't OLS 2013. Op YouTube zeen de leedjes te beloetsere en bekiêk, met echte clips !!!. 
mooshoofpaadzengers ;  mooshoofpaadzengers-kom mer nao Rooj
hoebe dre band            ; Hei op OLS 2013 Stramproy

Veur de echte leefhebbers van de Mooshoofpaadzengers en de Hoebe dré Band eine "mòt hebbe" oftewaal "must have". Dus zeetjer biê, vandaag nog hale................. Völ loetser plezeer.

VERKOUP OLS CD 2013

donderdag 21 februari 2013

Wie al gezagtj, zoeë gouw as wae 't wiste woeë en wannieër de CD van 't OLS 2013 te koup zoow zeen, mèt noew leedjes van de Mooshoofpaadzengers en de Hoebe Dré Band, zoje wae det laote wete. Nouw, 't is zoeë wiêt.De OLS ceedee 2013 van sjötterie Sint Anteunis oete Hei oet Rooj is vanaaf komendje zaoterdig te koup veur € 7,50 in Rooj bie C1000 , Bookhanjel Benelux en Dames klei-jingszaak Christian oppe Marijkestraot.
Paktj de kans, zoeë dedjer bedeine mèt 't OLS 2013 de sjötte leedjes oete kop kintj. Mer veural auch de 2 spesjaal gesjreve leedjes veur dit OLS 2013 ;  "Hei-op in Rooj" van de HDB en "Kom mer nao Rooj" van de MHPZ. Daonaeve nog van bei de groepe 4 anger kei sjieke leedjes, die de leefhebber neet kan en maag misse. Völ loester plezeer, auch names 't Komitê van 't OLS 2013.

STUDIO OPNAMES VEUR O.L.S. 2013 IN ROOJ

maandag 18 februari 2013

Aafgelaupe vriedig de 15e zeen wae nao de Marlstone studio gewaestj in Bunj, òm dao oos OLS leedje op te neme veur de Sjötte oete Hei in oos Rooj. ’t Is ein juweeltje gewore, vinje wae zelf. Mede dank zij de geweldjigge kwaliteit van de technikus Joep Servaes, dae alles heet opgenome, accordeon gespeultj en de mix heet gedaon. Klasse.
Kort euverzicht wie det ’t allemaol heet gegange.
9.40 aankomst in Bunj en wae waere ontvange door Robert Loozen (de baas) en Joep Servaes. Ieërst ein lekker tas koffie en dan keumtj Joep al kieke woeë wae blieve. Dae wiltj ane gang.
Ieërst gaon wae de muziek aanpasse zoeëdet wae eine bandj hebbe woeë wae tegooj op in kònne zinge. Joep geuftj zich hieël en al tamelik snel kònne wae inne studio de micro’s opstèlle in eine sirkel, zoeëdet wae dein danger auch good kònne zeen. Det is vertroetj en zingtj lekker. Waal weer meujlikker veur de technieker. Zoeë roondj half elf waere de ieërste noeëte de micro’s ingejaagtj en nao get kieëre instèlle van geluid geit ’t veur ’t echie. Toch mòt ’t versjillendje kieëre oppenoe, mer roondj ein eurke of 10 euver half 12 steit de zang d’r op.
Hienao gaon wae de muziek toevoege. Funs gitaar,fluit en tamboerijn. Frans en Zjaak trompet. Lei gitaar en Joep zelf nog eine sjitterendje accordeon. Det bie de belkes, basgitaar, ut snaerke en de bloasbas, zörgtj veur ein te gek gehieël.
Zjaak en Jan zeen inne tössetiêd get te aete gaon hale. Echt waor, bienao allemaaol bruuëdje gezoontj. Ze valle helaas get klein oet, mer wae hebbe get binne en kinne weer vroet. ’t Is roondj kwart euver twieë as wae ane mix beginne. Oeteindselik ’t belangriekste as alles in balans is en't good wils laote klinke. Joep toeëntj zich hiê en echte profesjonal in. Echt hieëlemaol te gek. Hie en dao get op-poetse, aanpasse, bitje knippe en plekke. alles zoeë snel det ’t bienao neet te volge is.
Mer aster òs oeteindelik ’t inj rizzeltaat lieëtj huuëre, klappere wae zelf toch waal get mèt d' oeëre. Oos biedrage aan ’t OLS 2013 is herstikke sjiek gewore.
Komendje vriejig de 22e weurtj de CD geprizenteerdj, mèt 5 leedjes van de Mooshoofpaadzengers en 5 leedjes van de Hoebe Drê Bend. Eder mèt ein noew spesjaal leedje veur dit OLS en veer anger krakers veur sjötte fieëste en tent fieëste.
Totaal ein herstikke sjieke Ceedee, die edere leefhebber mòt hebbe. Vanaaf de volgendje waek lichlik te kaup. Det laote wae nog effe wete via oos lèste noets, zoeë snel wae det proont wete.
Veur get fotoos van de opnames kòndjer kieke in oos foto-album. Tot dan.........