optraeje rust in Rooj

vrijdag 10 augustus 2012

Veurige waek hebbe wae ein soort van verassings optraeje gedaon in bejaardjehoês "rust in Rooj".
Hieël bezunjer òm veur de minse dao te zinge. Minse nog ins trök laote loestere nao aoj herinneringe.
Leedjes as "t dörp", "jeugdherinneringe", "wullem" of "des al lang neet mieër", wore òngerwerpe euver
30-40 jaor geleje. Dus erg herkinbaar veur òs "seniore".
Altiêd weer ein erg good geveûl asse minse kònst zeen geniete van diene hobby. Dao duise't veur.
Margriet en Dorrie....bedanktj. Minse van de "bedening inne kantien" dikke mersie.

Van oet de mooshoof

OLS weer in Rooj !!!!!!!!!!!!!!

vrijdag 10 augustus 2012

Inderdaad. waat waas 't weer ein grandioos fieëst in oos Rooj. Eine finale tösse òs eige Rojer sjötterieje.
de "blauw" oet 't dörp en de "greun" oete Hei. 't Zal bie de meiste minse waal bekindj zeen det wae
bie de Mooshoof sjötte van Sint Ketrien hebbe. En wae kònne uch vertèlle det wae allemaol vreiselik blie en gruuëts zeen op òs Hei-jer sjötte. want.......
WINNAAR   O.L.S.   2012   SINT  ANTEUNIS  OETE  HEI  OET  ROOJ  !!!!!!!!!!!!!!!!!!!!!!!!!!!!!!!!
Sjappoo veur de hieël sjötterie Sint Anteunis oete Hei en veural veur 't winnendj 6-tal.  PROFISIAT.
Hieël Rooj zal weer ane bak mòtte veur volgendj jaor, 1e zònnig van juli.
Wae winse Sint Anteunis hieël völ sterkdje, wiêsheid en sukses mèt de veurberei-jinge.
Weem weit kinne wae auch nog örges get biedrage ??

Waat ister toch gaondje?

vrijdag 20 juli 2012

2011 is veur de Mooshoofpaadzengers ein bewoge jaor gewaestj. Door diverse gebeurtenisse en völ hieël bezunjer gebeurtenisse hebbe wae aafgelaupe jaor dèkker opgetroje dan wae oeëts hebbe gedaon. Waal allemaol good euverwoge en allemaol veur òs as groep aeve belangriêk.

Optraejes hieël klein, mer auch mèt de Schintaler. Hieël erg imtiem waas ’t Kerstoptraeje oppe Ruiver. Mer veural oze daag oet nao Viêle is eine hieële bezunjere gewaest. Wanjele, terrasje pakke, verassings optraeje op det zelfdje terras en later nog ein verrassingsserenade bie ein stêl die allebei 60 wore gewore. Daonao heivers en lekker same get aete en naogeniete. Óm noeëts mieër te vergaete.

Wae krege ein speldj as “lid van verdeenste” van oos Rojer vaste- laovesvereiniging “de Zaotmaale”, woeë alles mèt begònne is. En wae woorte veur de veerdje kieër oetgenuuëdigtj door oze mentor Pierre Cnoups bie de NUL, Narre Universiteit Limburg. Wae krege ein döbbel Böl. Gedeurendje oos optraejes zoeë door ’t jaor kwaam auch ’t idee nao bove òm ein website op te starte. Die ister dus noê gekome, mèt de mètwirreking van Jan Janssen (ein van òs groeëtste Fens), Noud en Stan. Dao kome wae nog ins op trök.

Daodoor ister dus noê ein offisjeel websaajt van de Mooshoofpaadzengers inne locht of op ’t web. Wiedjer wiltj. Wae gaon de saajt good blieve updeete, zoeë dedjer oppe huuëgdje blieftj van ’t waal en wieë van de MHPZ.

’t Begîn ister. Get geschiedenis, tekste van de CD’s (nog lang neet allemaol), leedjes dietj gae kòntj beloestere en mètzinge mèt de tekste, al get fotoos zoeë door de jaore, gegaeves van de groepslede. Wae gaon det geleidelik aan aanvölle. ’t Kan al gezagtj waere det de sjötte CD en oos lèste CD “Applemoos” nog te koup zeen. De anger helaas neet mieër. Wie en woeë kòndjer wiejer laeze.

Wie al gezagtj; ’t begin ister en wae wille det gaer oetbouwe. Dao geit al snel ein òngerdeil “lèste noets” kome, zoeëdet wae dao alles in kwiêt kònne waat wae vinje detj gae drek moogtj/mòtj wete.
Wae hope oos Fens hiê ein plezeer met te doon en nateurlik auch òs zelf ei bitje. ’t Is bèst waal sjiek zoeë dien eige “saajt”. Völ plezeer gewinstj en nogmaals dank aan Jan, Noud en Stan veur de inspanninge òm dit op korte tiêd meugelik te hebbe gemaaktj.

De Mooshoofpaadzengers